Aðalfundur Háskólafélag Suðurlands var haldinn mánudaginn 4. maí og var hann sá 18. en félagið fagnar 20 ára afmæli á næsta ári. Á fundinum var farið yfir öflugt starfsár 2025, ársreikningur samþykktur, breytingar gerðar á samþykktum félagsins og ný stjórn kjörin.
Árið 2025 var mótunarár í starfi Háskólafélags Suðurlands en um mitt ár tók Ingveldur Sæmundsdóttir við starfi framkvæmdastjóra og í kjölfarið var unnið markvisst að framtíðarsýn, hlutverki og lykilverkefnum félagsins.
Í ársskýrslu kom fram að Háskólafélagið gegnir mikilvægu hlutverki sem tengiliður háskóla inn á Suðurland, styður nemendur í heimabyggð og vinnur að því að efla Suðurland sem þekkingar- og nýsköpunarsamfélag. Félagið er í eigu 14 sveitarfélaga á Suðurlandi og SASS og hefur það hlutverk að bæta aðgengi íbúa að háskólamenntun, sí- og endurmenntun og stuðla að nýsköpun sem eykur samkeppnishæfni landshlutans. Sérstaka athygli vakti að í desember var stærsta prófatíð í sögu félagsins. Á árinu voru þreytt alls 1.317 fjarpróf hjá Háskólafélaginu, þar af 1.098 á háskólastigi. Langflestar prófskráningar komu frá nemendum Háskólans á Akureyri, eða 74%, en nemendur frá Háskóla Íslands, Háskólanum á Bifröst, Háskólanum í Reykjavík, Landbúnaðarháskóla Íslands og Listaháskóla Íslands nýttu einnig þjónustuna.
Á árinu var einnig unnið að kortlagningu og tækifærum í örnámi. Í september var haldin vinnustofa með Háskólanum á Hólum, SASS og fulltrúum atvinnulífs um þróun örnáms á háskólastigi á sviðum sem tengjast helstu atvinnugreinum Suðurlands, meðal annars ferðaþjónustu í dreifbýli, íslenska hestinum og landeldi.
Nýsköpun var jafnframt fyrirferðarmikil í starfsemi ársins. Háskólafélagið veitti ráðgjöf til frumkvöðla, stóð að viðburðum og fræðslu og lagði grunn að frekari uppbyggingu nýsköpunarstarfs á Suðurlandi. Yfir 50 einstaklingar leituðu aðstoðar vegna nýsköpunar, atvinnuþróunar, styrkjamöguleika og stoðkerfis nýsköpunar. Þá hófst undirbúningur að mótun nýsköpunarstefnu fyrir Suðurland, sem Háskólafélagið leiðir í samstarfi við SASS með stuðningi úr Sóknaráætlun Suðurlands.
Háskólafélagið er einnig með samning við SASS um starf byggðaþróunarfulltrúa í neðri hluta Árnessýslu í atvinnu- og byggðaþróun. Meðal verkefna var ráðgjöf vegna Uppbyggingarsjóðs Suðurlands, þátttaka í svæðisbundnum verkefnum og samstarf um frumkvöðlastarf, þar á meðal Startup Landið. Tveir sunnlenskir þátttakendur tóku þátt í hraðlinum, verkefnin Hundaveisla og Festivus.
Unnið var að rannsóknar og samfélagsverkefnum en félagið leiðir umfangsmikið Erasmus+ verkefni með samstarfsaðilum í Slóveníu og Serbíu, þar sem markmiðið er að valdefla fullorðið fólk og efla þátttöku þess í samfélaginu með áherslu á sjálfbærni, inngildingu og lýðræðislega virkni. Þá var unnið að verkefni um almenningssamgöngur í neðri hluta Árnessýslu, þar sem kannaðir eru möguleikar á reglulegum ferðum milli þéttbýliskjarna í samstarfi við skóla, íþróttafélög og eldri borgara.
Á aðalfundinum fór Arnar Leó Guðnason hjá KPMG yfir ársreikning félagsins. Rekstrarniðurstaða ársins var jákvæð og félagið rekið með hóflegum afgangi. Í samræmi við samþykktir félagsins er óheimilt að greiða út arð til hluthafa og skal öllum umframhagnaði varið til verkefna í þágu almannahagsmuna.
Fundurinn samþykkti einnig breytingu á samþykktum félagsins þess efnis að stjórn verði skipuð fimm einstaklingum í stað sjö og að varastjórn verði jafnframt skipuð fimm einstaklingum tilnefndum af SASS. Í nýrri stjórn Háskólafélags Suðurlands sitja Helga Þorbergsdóttir, Hugrún Harpa Reynisdóttir, Sæunn Stefánsdóttir, Soffía Sveinsdóttir og Guðmundur Ármann Pétursson, sem kemur nýr inn í stjórn. Í varastjórn sitja Anton Kári Halldórsson, Arnar Freyr Ólafsson, Árni Eiríksson, Brynhildur Jónsdóttir og Sandra Sigurðardóttir.
Á fundinum voru fráfarandi stjórnarmönnum færðar þakkir fyrir störf sín, sérstaklega Sveini Aðalsteinssyni, fráfarandi formanni, sem kom að stofnun Háskólafélags Suðurlands og hefur lagt félaginu lið allt frá upphafi. Sveinn rakti sögu félagsins og minnti á að frá upphafi hafi markmiðið verið að efla búsetugæði á Suðurlandi með auknu aðgengi að menntun, rannsóknum og samstarfi við atvinnulíf.
Í lok fundar kynntu verkefnastjórar félagsins yfirstandandi verkefni, meðal annars samstarf við sunnlenska englafjárfesta og fyrirhugaðan pitch-viðburð á Selfossi 21. maí, Erasmus+ verkefni félagsins og könnun um almenningssamgöngur.
Starf Háskólafélags Suðurlands árið 2025 sýnir skýra sókn í þágu menntunar, nýsköpunar og byggðaþróunar á Suðurlandi. Með öflugri nemendaþjónustu, mótun nýsköpunarstefnu og fjölbreyttum samstarfsverkefnum erlendum og innlendum hefur félagið styrkt stöðu sína sem mikilvægur drifkraftur þekkingar, rannsókna og verðmætasköpunar í landshlutanum.
Ársskýrslu og ársreikning er hægt að finna hér.