Nemendur eru almennt ánægðir með nemendaþjónustu Háskólafélags Suðurlands samkvæmt könnun.
Til þess að geta mætt þörfum nemenda eins og kostur er var gerð þjónustukönnun fyrir notendur nemendaþjónustu Háskólafélags Suðurlands á vormánuðum. Var markmiðið með könnuninni að meta ánægju notenda hvað varðar nemenda- og prófaþjónustuna sem veitt er í Fjölheimum.
Margt áhugavert og skemmtilegt kom i ljós við úrvinnsluna sem verður deilt hér með lesendum.
Svörunin var ágæt en 80,4% þátttakenda voru mjög ánægðir með þjónustuna á meðan 15,2% voru ánægð. Um 4,3% svöruðu hvorki né. Flestir sem nýta sér nemendaþjónustuna eru nemendur í háskólanámi, ýmist í fjarnámi eða blönduðu stað- og fjarnámi. Þá eru nokkrir nemendur í framhaldsskóla sem nýta sér þjónustuna og þó nokkrir sem stunda annars konar nám, eins og endurmenntun eða sértæk námskeið í fjarnámi.
Það er oft líf og fjör í kringum prófatíð þegar nemendur streyma að til próftöku sem kallar á mikið skipulag. Jólapróf og vorpróf halda sínu striki en að auki eru háskólarnir farnir að leggja áherslu á símatsdaga og miðannarpróf sem heldur nemendum á tánum alla önnina. Elínborg Ingimundardóttir heldur vel utan um nemendur en hún er þjónustufulltrúi nemendaþjónustunnar og ber hita og þunga skipulagsins sem fylgir mótttöku nemenda.
Þegar þátttakendendur voru spurðir um nemendaþjónustuna var almenn ánægja um mótttöku og framkvæmd prófa. Eftirfarandi punktar komu meðal annars fram:
- FRÁBÆRT FÓLK AÐ VINNA ÞARNA
- MJÖG GÓÐ ÞJÓNUSTA
- SAMSKIPTI OG LIÐLEGHEIT GÓÐ
Nemendur voru einnig spurðir út í aðstöðuna. Annars vegar var spurt út í nemendaaðstöðu líkt og lesbása og hins vegar um kaffiaðstöðuna.
Fleiri og fleiri eru farnir að sjá hag í því að koma í Fjölheima sem er afar ánægjuleg þróun. Örlitlir vaxtaraverkir fylgdu fjölguninni sem bætt hefur verið úr. Ljósum hefur verið bætt við lesbásana og nóg er til af fjöltengjum fyrir nemendur. Það var það sem nemendur kölluðu eftir og var kallinu svarað með ánægju.
Kaffiaðstaðan er fjölnota rými sem býðst nemendum til afnota. Þar er fín aðstaða sem hentar mjög vel fyrir smærri hópa til hópavinnu sem og fyrir einstaklinga sem vilja nýta sér rýmið til lesturs. Gaman væri að sjá betri nýtingu á kaffiaðstöðunni og er von um að með fleiri nemendum sjáist til fleirri niðursokkinna lærdómshesta í aðstöðunni.
Reynt hefur verið að halda verðinu í lágmarki og eru lang flestir ánægðir með gjaldskránna eins og hún er í dag. Það skiptir máli að halda verðinu hæfilegu til að mæta þörfum nemenda og hefur það verið gert eftir fremst megni.
Nemendur fá bestu þakkir fyrir þátttökuna í könnuninni og er auk þess alltaf velkomnir í Fjölheima. Að lokum, hægt er að bóka próf, sækja um kort og fá frekari upplýsingar með því að senda póst á prof@hfsu.is. Einnig eru upplýsingar um verðskrá og aðstöðuna í Fjölheimum að finna hér.
Gangi ykkur vel.