Leiðsögn í sjálfbærni í Háskólafélagi Suðurlands

Háskólafélag Suðurlands hélt sjálfbærnivinnustofu í Fjölheimum á Selfossi þriðjudaginn 10. nóvember þar sem Erasmus+ verkefnið Roadmap to Sustainable Living (RSL) og afurðir þess voru kynntar. Á vinnustofunni gafst gestum tækifæri til að kynna sér fjölbreyttar afurðir úr Fab Lab, spreyta sig á skemmtilegum sjálfbærniþrautum, föndra vinabönd og taka þátt í fata- og bókaskiptimarkaði. Einnig gátu gestir flett nýútgefnu fræðsluefni verkefnisins og kynnt sér einfaldar leiðir til að tileinka sér sjálfbærari venjur í daglegu lífi. Hagnýtt fræðsluefni fyrir fjölbreytta hópa

Vinnustofan er hluti af 18 mánaða samstarfsverkefni sem hófst í september 2025 og lýkur í febrúar 2027. Háskólafélag Suðurlands leiðir verkefnið í samstarfi við aðila í Slóveníu og Serbíu. Meginmarkmiðið er að efla umhverfisvitund og hvetja fólk til sjálfbærari lífshátta. Sérstök áhersla er lögð á að ná til einstaklinga sem hafa af ýmsum ástæðum færri tækifæri til þátttöku í samfélaginu.

Í verkefninu hefur verið þróað hagnýtt og aðgengilegt fræðsluefni sem nýtist jafnt einstaklingum, fræðsluaðilum og stofnunum. Þar má nefna Leiðarvísi að sjálfbærum lífsstíl (Roadmap to Sustainable Actions) og Dagbók til sjálfbærara lífs (The Daily Sustainable Journal). Efninu er ætlað að hvetja fólk til að prófa nýjar venjur og festa þær í sessi.

Fræðsluefnið verður aðgengilegt á íslensku, ensku, slóvensku og serbnesku. Með því er stuðlað að auknu aðgengi og þátttöku ólíkra hópa.

Lítil skref geta skipt miklu máli

Þótt verkefninu ljúki formlega í febrúar 2027 er markmiðið að afurðir þess nýtist áfram og hvetji sem flesta til að taka meðvitaðri ákvarðanir í daglegu lífi. Sjálfbærnivinnustofan tókst vel og var ánægjulegt að sjá gesti taka virkan þátt í fjölbreyttum viðfangsefnum. Sérstaklega þótti okkur vænt um að fá góða gesti frá Sólheimum, þar sem sjálfbærni hefur lengi verið órjúfanlegur hluti af daglegu lífi. Gestirnir búa yfir dýrmætri þekkingu og reynslu á þessu sviði og hafa sannarlega ýmislegt að kenna okkur hinum um sjálfbæra lifnaðarhætti.

Vinnustofan minnti okkur á að sjálfbærni snýst ekki aðeins um að miðla þekkingu heldur líka um að læra hvert af öðru, deila reynslu og finna saman skapandi lausnir. Að gefa fötum og bókum framhaldslíf, nýta efnivið sem þegar er til og deila hugmyndum eru allt dæmi um einfaldar aðgerðir sem geta haft jákvæð áhrif á umhverfið.

Háskólafélag Suðurlands þakkar öllum sem lögðu leið sína á vinnustofuna og tóku þátt í að gera sjálfbærni að skemmtilegu og skapandi viðfangsefni.